Search

nb gedigte poetry

Nuut: Ingrid Jonker – Versamelde gedigte

ingrid-jonker-versamelde-werke_cover

Nou beskikbaar: Ingrid Jonker: Versamelde gedigte

Hierdie versameling van Ingrid Jonker se werke sluit in al haar gepubliseerde gedigte (bundels: OntvlugtingRook en okerKantelson) sowel as jeugwerk.

Ingrid Jonker se lewe is ’n verhaal wat steeds nie net die verbeelding aangryp nie, maar ook lesers fassineer. Bewyse van haar uitsonderlike skryftalent, haar verbeelding en ervaring van die realiteit, asook die interessante en onstuimige draaie wat haar lewenspad geneem het, word in elke gedig bespeur.

Dié besonderse heruitgawe (hardeband met stofomslag) herinner ons waarom van Jonker se bekendste werke, soos “Ek herhaal jou”, “Die kind” en “Bitterbessie dagbreek” steeds beskou word as van die mees geliefde gedigte in die Afrikaanse letterkunde.

Koop dit nou! Loot | Raru | Graffiti

sale-1

Nuut: ‘n Hunkering se grein deur Johann de Lange

n-hunkering-se-grein’n Ryk geskakeerde bundel waarin dié bekroonde digter indringend fokus op temas soos, onder meer, skoonheid teenoor verval, die skoonheid in verval, die troos van die woord en die gedig, die weerloosheid van die lewe en menswees, en die erotiek wat tog so deel vorm van elke mens. Daar is heelwat vernuwende elemente – meer waarneming, meer metafisies en fyner gedraad. Die verse is pretensieloos en daar is geen poging om die leser te beïndruk met ’n verwikkelde verwysingswêreld nie. Eenvoud is die eerste wagwoord, en die tweede is eerlikheid. Dit is ’n bundel wat na baie kante strek, maar wat konsekwent tot die leser spreek. Dit is ’n sensitiewe stuk werk wat vir die ware teksleser oneindige vreugde sal verskaf. ’n Uitstekende toevoeging tot die Afrikaanse digkuns.

Oor die digter:

Johann de Lange is op 22 Desember 1959 in Pretoria gebore. Sy debuutbundel Akwarelle van die dors (1982) is met die Ingrid Jonkerprys bekroon. Sy vierde bundel, Wordende naak, word met die Rapportprys vir Poësie bekroon in 1990. Die algebra van nood, wat in 2009 verskyn het, is in 2011 met die Hertzogprys bekroon.

Koop dit nou!  Takealot | Loot |Graffiti

Nuut: Indeks deur Joan Hambidge

indeks-omslag Hierdie uiters volwasse bundel reis op uitgebreide paaie na wat die wese is van die digkuns. Die digter is in konstante gesprek met die woord en die moontlikhede wat die woord bied. Haar vermoë om die woord se wisselende buie, in gesprek met ander woorde, raak te sien en te benut, is nog nooit só suksesvol aangewend nie.

Met ’n meer liriese aard, toeganklikheid en innige menslikheid is Indeks ’n hoogtepunt in Hambidge se oeuvre.

Oor die digter: 

Joan Hambidge is een van die bekendste literêre figure in SA. As kritikus skroom sy nie om in die letterkundige bokskryt te klim om haar oortuiginge te verdedig nie. Sy is professor in Afrikaanse letterkunde en kreatiewe skryfwerk aan die UK. In 2012 is haar bundel Visums by verstek met die ATKV-Woordveertjie vir Poësie bekroon.

Koop dit nou!  Takealot | Raru | Loot | Graffiti 

Nuut: In die grot van die sibille

‘n Nuwe digter debuteer hierdie maand by NB-Uitgewers. Juanita Louw se beeldryke gedigte, opgeneem in die spogbundel In die grot van die sibille, is vars en vernuwend en sal lank by die leser bly.

In die grot van die sibille

Oor die bundel:

“Die digter se taak is om die verborge te ontbloot. Elke gedig is ’n uiting van die sibille.”

Dié woorde van Sowjet-digter Marina Tswetajewa eggo in Juanita Louw se debuutbundel waar digkuns gelykgestel word aan die magiese woord wat deur die mitologiese profetes in haar grot gespreek is.

Die leser gaan as ’t ware die trapesoïdale ingang van die grot binne waar klankryke, evokatiewe verse met droomagtige, eksotiese beelde die menslike kondisie belig.
Louw werk met fassinerende stof uit ander kulture wat selde in Afrikaanse digkuns op hierdie prikkelende, meevoerende manier ontgin word. Die bundel word verryk deur ’n uitgebreide verwysingsveld, insluitende fabels, mitologie, kuns, literatuur, films, musiek en natuurlik digkuns – produkte van die mistieke skeppingsdrang.

Oor die digter:

Juanita Louw voltooi haar Meestersgraad in Kreatiewe Skryfkuns in 2014 aan die Universiteit van Kaapstad. Voorheen werk sy vir geruime tyd in ’n hospitaal in Londen se Ooseinde. Deur die jare werk sy ook met antieke juweliersware en gee Engelse klasse aan buitelanders. Sy is gebore in die Vrystaat en bestuur tans ʼn sielkunde-praktyk in Kaapstad.

Kom kuier saam by die bekendstelling:

In die grot STB

Natalé Buffels: Adam, jou woorde leef in my

‘n Gedig deur Natalé Buffels as huldeblyk aan Adam Small

Adam

My eerste ontmoeting met jou

was toe ek grootskool toe gaan.

Daar het ek vriende gemaak

met Doemanie

en ek het met jou

Oppie Parare gesit.

 

Ons tweede ontmoeting

was die jaar

Van ons skoolkonsert.

Jou werk is voorgedra.

Daar het ek weer vir Doemanie gekry.

 

Ek het verlief op jou geword.

 

My laaste jaar op skool ontmoet ek

vir Map en Blanchie en Cavernelis.

Ek hou van hulle

want jy het hulle geskape.

Ek moes lees in die klas.

Ek wou nie.

Ek wou luister.

na jou, jou skeppings.

Jy was my allerhoogste.

 

 

En toe leef ons mekaar weer raak, ek en jy, op UWK.

Ek voel nader  aan jou.

Jy word myne.

Jy voer my weg, in Afrikaans.

Ek lees van Kanna.

Ek hoor jy is ʼn Sestiger.

Ek is trots op jou.

Jy nooi my uit,

Kô laat ôs sing”.

Ek sing saam met jou.

Met jou. Saam.

 

Maar  vir eers moes ek jou los. Vir  Breytenbach. En  Krog.

Ek hou van hulle.

maar dis vir  jou wat ek mis.

 

En dan,  wanneer jy daar staan…

Jou wit hare vang my oog.

Dit lyk mooi.

Jy glimlag breed

daái Saterdagoggend, die laaste dag van SAS4.

 

Ek staar verstom.

Ek wil  praat, Afrikaans praat,

maar ek is stom.

Ek neem ʼn foto.

 

Stom.

 

Jy kon nie lank bly.

Jy moes gaan.

Aan die sy van jou vrou,

jy moes gaan.

Ek staar na die deur.

 

Ek is stom.

 

My hart is seer.

Ek gaan jou nooit weer sien.

Jy is nou daar

waar Engele rus en vrede verdien.

 

Slaap sag.

Hou wag van bo.

Nou is ek nie langer stom.

Ek doen wat jy gedoen het.  In Afrikaans. Praat. Skryf. Sing.

Jou woorde leef in my, dat ons taal

 

sal voortleef solank as wat daar mense is wat dit praat.

 

Jason Jacobs: vir wyle Adam Small

’n Gedig deur Jason Jacobs as huldeblyk aan Adam Small

Jason Jacobs
Jason Jacobs

Kers
vir wyle Adam Small
28/06/2016

‘n Kers vou uit die nag
woorde ontsnap,
gedagtes
wat wyd vloei en grond los loop,
wat op die wind ry en wolke los dink:
mis
smekend na die son om die kus weer op te tel,
tafeldoeke wat op omkeer verhelder
rotse brand uit gebed
oorskiet-vlam wat koue harte troos
en met tyd wals

die wind skep lig

‘n maan brand wit

 

Besoek Jason Jacobs se webblad

Kelly-Lee Ohlson: Kô lat ek dankie sê

’n Gedig deur Kelly-Lee Ohlson as huldeblyk aan Adam Small

Kelly-Lee Ohlson
Kelly-Lee Ohlson

Kô lat ek dankie sê

Adam, vi’ jou skryf ek ‘n kaalvoet gedig

Soema’ soe sonne ienige hoge woorde

Sonne ienage anglisismes

Sonne ‘n angeplakte aksent

Net soema

‘n kaalvoet gedig –

 

Want djy’t my taal grootgemaak

In jou groot, stêk bryn hanne

Djy’t Kaaps gebeitel met jou slim foenetiese aanslag

En skêp woorde

 

 

My jy is nou ‘n djy

My grap is nou ‘n joke

My skottelgoed is nou skorregoed

Djy’t jou lewe opgeoffe’ vi’ my taal

Solat ek oek nou trots is as ek my mont

Oepe maak en my Kaaps soe ‘n lekke’ backflip in my mond maak

Dankie dat djy soes ‘n Moses die stemloses gelei het

 

Jou skrywes is my ienagste Bybel

Wan êrens in my neigborhood is daar ‘n Blanchie  wat ha lyf verkoep,

is daar ‘n Makiet wat vi’ ha’ seun bid

is daar ‘n doemanie met ‘n palys hys en ‘n aeroplane-motorkar

 

 

Adam, jou naam is soes ‘n koesieste’

in my siel ingeweef

djy is een met my identiteit

ek sien my in jou

ek sien jou in my

ek is djy

djy is ek

 

Maar ek is soe sorry Adam

Dat Kaaps nog gesien word

As die stiefkind van Afrikaans

 

 

Shirmoney Rhode: Koebaai Adam, koebaai

Twee gedigte deur Shirmoney Rhode as huldeblyk aan Adam Small

Shirmoney en Adam
Shirmoney Rhode en Adam Small by die vierde Swart Afrikaanse Skrywersimposium (UWK, 2015)

Adam van al’ie nasies

Vi’ Adam Small (2016)

 

Soes ’n Adam aan die begin van al’ie nasies,

het jy oek spasie gemaak vi ’n rib aan jou sy,

’n Rosalie soos ’n Rut van ouds,

getrou tot aan die roggel.

Getrou aan die rib van jou rib.

 

Soes ’n Adam aan die begin van al’ie nasies

het jy spasie gemaak vi ’n taal.

’n Standaard.

’n Bolands.

’n Kaaps.

Afrikaans met al sy gesigte.

 

Daai oem da erens in Wellington

met sy vaal stof skoene en brei in sy vehemelte.

Daai antie in Hanover Park met die overall by die wasgoedlyn,

wie se valse tanne nog in ‘n glasie water voo ha kooi staan.

 

Jy’tie geskroom om hulle storie te vetel nie

Jyt oekie gedink hulle is te common vi Afrikaans’ie

 

Soes ‘n Adam van ouds het jy opgestaan na die

val vannie vrug, jyt opgestaan van jou rug

en met pen en papier geploeg en gespoeg.

Soema in die gevriete van daai’s wie gemean

het Kaapse Afrikaans is nie genoeg.

 

Innie liewens van die randfigure het jy die Here gesien,

en sy werke verstaan.

Tanne getel vannie straatvieer en factory worker,

die vrugtesmous en blommeverkoeper.

 

Soes ’n Adam van ouds, was jy die vrug vannie liewe

gegie, en toe jy kan sien, het jy geskrywe wat jy sien.

Met jou kitaar as kruis het jy van huis tot huis mure

afgebriek van disgrace.

 

En nou pellie, kan ek my weergawe vannie taal

praat sonne om skaam te skuil omdat sommiges mean

my storie makie sakie.

 

Jyt gese dit maak saak, en nou is daai al wat vi’my matter.

Dit staan geskrywe, maybe nou nie op lywe, ma in my hart

wa dit hoort.

 

Saloet. Saloet. Saloet.

 

Spore op die hart

Vi’ Adam Small (2016)

 

En nou Adam, kom die storms

om jou spore

van die aarde se mat

weg te vee.

Soes ma’me hulle altyd gesê het.

Maa’ my hart, hy is nog uitgetrap met jou woorde.

Jou spore.

Hulle sit hier voorlangs op die stoep.

En as die son die die dag weer leer om daar te kom mooi maak,

sal’ik vir almal ‘n gedeelte van my hart gee.

Besaai met jou woorde.

Koebaai Adam, koebaai.

KÔ, LAT ONS SING – Adam Small

Blog at WordPress.com.

Up ↑